شو افضل تخصص جامعي يدخله خريج الثانوية العامة ؟
مرحبا شبابا وصبايا ,
ضايل اقل من 15 يوم لنتائج الثانوية العامة
انتو اتعبتوا كتير على
مدار السنة , من هذا اليوم ومن امبارح ومن قبل
حيضل السؤال اللي بدور
في بال الجميع من الطلاب واهليهم
كيف اختار التخصص
الجامعي ؟
طبعاً بعيداً عن نتيجتك
في الثانوية العامة اللي راح تتحكم في التخصص .
بضل في كتير خيارات
متاحة لكل نتيجة , خاصة انه مفتاح القبول في الجامعات صار في مستويات متدنية نوعاً
ما
حتسأل نفسك كيف اختار
افضل تخصص ؟!
عشان نكون منطقييين
طبيعة التعليم في مجتمعاتنا ما بتأهل الطالب التوجيهي انه يبينى فكرة عن التخصص
الجامعي اللي راح يختاره
كمان طبيعة مجتمعاتنا ما
بتشجع الطلاب على التوجه لتخصصات مرتبطة بفتح بزنس خاص مستقبلاً , طالب الامتياز
في الثانوية من الصعب انك تقنعه انه يدخل ادارة اعمال , بسبب الضغط الاجتماعي
والموروثات الفكرية اللي فوق 90 يكون مهندس واللي فوق 95 طب , واللي واللي
اليوم يا شباب لو انا
بدي احكيلكم عن رأي الشخصي حيكون الكلام مش منطقي , لانه بنفعش يكون رأي شخص واحد هو
الموجه لتحديد فكركم ورغباتكم
نفهم من هذا الكلام ,
يعني ما في وسيلة اختار فيها التخصص , بالتأكيد لأ
في وسيلة
أول شيء لازم تفرق بين
الهواية والعلم , يعني مش معقول اني بحب الرسم يبقى لازم ادخل تربية فنية , انا
ممكن ادخل تجارة واضل امارس هوياتي الفنية .
وكمان خلونا نكون جديين
مش كل من ببعكش في اجهزة التلفزيون الخربانة في بيته وبعرف يفرمت الوندوز انه لازم
يكون مهندس كمبيوتر او الكترونيات
كمان مرة العلم اشي ,
والهواية اشي تاني خالص .
زادت الحيرة ... كيف
اختار التخصص صح ؟!
خلينا مع بعض نفكر يا شباب ولو لمرحلة في حياتنا لوين
متجه العالم ومجتمعاتنا وبلدنا بشكل خاص في التوظيف وفرص العمل
بتتوقعوا من هان ل5 سنين
حيكون فرص كبيرة لتشغيل مهندسين وأطباء ومحاسبين وممرضين , خلينا نفكر سوا .
خلال نفس ال5 سنين ,
قديش في تطور في العالم حيستلزم مزودين خدمات في البرمجة والتصميم الجرافيك ,
بمعنى اخر علوم الاي تي (تكنولوجيا المعلومات ) , هذا التخصص اذا دخلتوا وانتا
رغبان تتميز فيه ممكن تتحول في فترة بسيطة من مجرد طالب او خريج لمدير عمل او صاحب
شركة بتنفذ كتير مهام داخل وخارج وطنك , واعتقد انه ازمة الكورونا بينت لاي درجة
العالم احتاج وراح يحتاج وحيضل يحتاج كل ما يتعلق بالتقنية زي التعليم عن بعد ,
الاجتماعات عن بعد وتنفيذ مهام العمل من البيوت وهو ما يطلق عليه الاعمال الحرة
الفريلانسر .
احنا هنا ما بنفر الطالب
عن دخوله الطب او الهندسة او التجارة او التربية , مدرسينا على عينا وراسنا
ولولاهم ما كنا قادرين نقعد امام الكاميرا ونحكي الحكي هذا , لكن وهذا الهدف من
نصحيتي , لما تختار تخصصك فكر كيف حتبني بزنس خاص الك من هذا التخصص , سواء بشكل
مباشر أو غير مباشر .
يا ريت الجهات المختصة
تقدر تنمي في الطلاب التوجه للتعليم المهني , اللي انا واثق انه اي واحد تخرج
بمعدل يدخله البكالوريس صعب جداً يقتنع هو او أهله بالالتحاق بتخصص مهني زي
ميكانيكا السيارات , تكنولوجيا التصميم الابداعي , ورش حرفية متقدمة ...الخ
ظناً من الجميع انه هذا
المخرج راح يطلع الطالب عامل , وطبعاً كل الاحترام لعمالنا , لكن لما الطالب
المتميز في الثاتوية يدخل تخصص مرتبط بالتعليم المهني , معناته احنا بنتجه لتحسين شريحة
المهنين في البلد
وبنقلل من معدلات
البطالة بين الخريجين .
شباب وصبايا حطوا نصب
عنيكم انه الدراسة الجامعية الها قيمة بس تطوير مهاراتك في اللغة الانجليزية الها
اهمية وقيمة عالية جداً وخلينا نكون صريحين اذا ما اسثمرتش ايام دراستك الجامعية
في تطوير لغتك الانجليزية حيكون صعب جداً جداً تحسن مستواك بعد دخولك معترك الحياة
وسوق العمل وبتضعف فرصتك الحصول وظيفة في مؤسسة دولية في بلدك
عشان ما نتشتت يا شباب
معدلك في التوجيهي كتير مهم لكن التخصص اللي راح تختاره هو اللي راح يضل معك طوال
عمرك فكر صح واختار الفرصة اللي تمكنك من خريج جامعة لمدير مشروعك الخاص
الفترة الجاية ما حتكون
في وظايف حكومية للجميع ولا حيكون وظايف في مؤسسات اهلية وخاصة للجميع , الفترة
الجاية فترة العمل الحر والبزنس الخاص والعمل عن بعد
طور هوايتك ,اهتم
بدراستك , خطط صح
ما تهتم برأي الناس ولا
تخلي معدلك العالي سبب مشكلة في اختيار تخصص انتا مش حابه او مش مفيد على المدى
البعيد .
ما تحس بالخجل انك اخترت
تخصص بدخله اللي جايب 70% وانتا معدلك 90% , هو حيتميز في مجال وانتا راح تتميز في
مجالات كتير تانية .
استنوني في سلسلة
فيديوهات حنحكي فيها اكتر عمق وتخصص عن اختيارات واعمال حرة ممكن نتعلمها جنب
دراستنا في الجامعة عشان لما تتخرج تكون جاهز لادارة اول مشروع خاص الك .
في نهاية هذا الفيديو ,
اذا كنت بتشاهدني من الفيس بوك يا ريت تضغط على رابط القناة في اليوتيوب والاشتراك
فيها , وشاركنا في قسم التعليقات شو التخصص اللي حابب تدخله ؟